CHINESE PRESIDENT XI JINPING, NAKIPAGPULONG SA ILANG FOREIGN LEADERS

Sa sidelines ng G20 Summit sa Hamburg, Germany, magkakahiwalay na pinulong noong Sabado, ika-8 ng Hulyo 2017, ni Chinese President Xi Jinping ng ilang foreign leaders.
Sa kanyang pakikipagpulong kay US President Donald Trump, binigyang-diin ni Xi, na dapat igalang ng dalawang bansa ang mga nuclear interest at malaking pagkabahala ng isa’t isa, maayos na hawakan ang mga pagkakaiba at sensitibong isyu, at magkasamang itaguyod ang kanilang relasyong pangkabuhayan. Inulit din niya ang pagtutol sa pagdedeploy ng Amerika ng Terminal High Altitude Area Defense system sa South Korea.

Tiniyak naman ni Trump, ang kahandaan ng Amerika, kasama ng Tsina, na palawakin ang dayalogo at kooperasyon sa iba’t ibang larangan, at panatilihin ang pag-uugnayan sa mga mahalagang isyung panrehiyon at pandaigdig.
Sa kanya namang pakikipagtagpo kay Japanese Prime Minister Shinzo Abe, sinabi ni Xi, na ang mga narating na prinsipyo ng China at Japan sa mga isyu ng kasaysayan sa Taiwan, ay mahalaga para sa pundasyong pulitikal sa relasyon ng dalawang bansa. Umaasa aniya siyang igigiit ng Japan ang naturang mga prinsipyo, at ipakikita sa pamamagitan ng mga aktuwal na patakaran at aksyon, ang kahandaan nitong pabutihin ang relasyon ng dalawang bansa.

Sinabi naman ni Abe, na hindi nagbabago ang posisyon ng Japan sa isyu ng Taiwan, na ipinaliwanag sa magkasanib na pahayag nila ng China noong 1972. Ipinahayag din niya ang kahandaan ng Japan, kasama ng China, na talakayin ang kooperasyon sa ilalim ng Belt and Road Initiative.

Nagkita naman, sa kauna-unahang pagkakataon, sina Xi at Pangulong Emmanuel Macron ng Pransya. Nagpalitan sila ng palagay hinggil sa pagsusulong ng relasyon at kooperasyon ng dalawang bansa. (CRI/DZME)

RESULTA NG PAGBISITA NI CHINESE PRESIDENT XI JINPING SA RUSSIA AT GERMANY, AT PAGDALO SA G20 HAMBURG SUMMIT, IBINIDA NI FOREIGN MINISTER WANG YI

Mula noong ika-3 hanggang ika-8 ng Hulyo, 2017 ay bumisita si Chinese President Xi Jinping sa Russia at Germany, at dumalo rin siya sa G20 Summit sa Hamburg, Germany.
Kaugnay nito, ibinida ni Chinese Foreign Minister Wang Yi ang mga naging bunga ng lakad ni Pangulong Xi.

Sinabi ni Wang na tagumpay ang biyaheng ito sa ibayong pagpapalakas ng estratehikong koordinasyon at pragmatikong pagtutulungan ng Tsina at Rusya sa mas mataas na antas. Aniya pa, ibayo pa nitong pasusulungin ang relasyong Sino-Aleman, pagtutulungan sa pagitan ng Tsina at Europa, pagsusulong ng pagtutulungan ng G20, at pagbibigay ng bagong sigla sa pangangasiwang pangkabuhayan ng mundo.
Ani Wang, sa pananatili ng G20 Hamburg Summit, dumalo si Pangulong Xi sa mga talakayan hinggil sa kalagayang pangkabuhayan ng daigdig, kalakalan, pinansyal, enerhiya, pagbabago ng klima, isyu ng Aprika, kalusugan, paglaban sa terorismo at iba pa. Inilahad ni Xi ang ideya at paninindigan ng Tsina sa mga may-kinalamang isyu, gayundin ang pagsusulong ng kooperasyong pandaigdig, dagdag pa ni Wang. Sinabi pa niyang binigyang-diin din ng Chinese President na nagkakaisa at nagkokomplemento ang ideya ng pagbubukas, pagtutulungan at win-win situation na itinataguyod ng Belt and Road Initiative, at diwa ng partnership at pagtatatag ng bukas na kabuhayang pandaigdig na itinataguyod naman ng G20. Ito aniya’y para sa magkasamang pagsusulong ng kabuhayang pandaigdig.
Ani Wang, nakapaloob sa kumunike na inilabas ng Hamburg Summit ang mga mungkahi at ideya na iniharap ni Pangulong Xi. Aniya, patuloy nitong ipinapatupad ang komong palagay na narating sa Hangzhou Summit ng G20.
Sinabi rin ni Wang, na mula noong ika-3 hanggang ika-8 ng Hulyo, dumalo si Pangulong Xi sa 40 bilateral at multilateral na aktibidad at nakipag-usap siya sa mga lider ng ibat-ibang bansa’t organisasyong pandaigdig, na kinabibilangan ng Pangulo ng Amerika, Timog Korea, Pransya, Punong Minsitro ng Britanya at Singapore, at iba pa.

Narating aniya ng mga lider ang mga bagong pagkakasundo sa pagpapatibay ng pagtitiwalaang pampulitika, at pagpapalalim ng bilateral at multilateral na kooperasyon.

Ipinahayag ni Wang na bilang bagong pahina sa kasaysayang pandiplomasiya ng Tsina na may katangiang Tsino, ang biyaheng ito ni Pangulong Xi ay nagpapalalim ng komprehensibong patakarang panlabas ng Tsina at nagpapataas ng aktibo at konstruktibong imahe ng bansa sa daigdig. (CRI/DZME)

(EXCLUSIVE) PHILIPPINE MEDIA DELEGATION, BUMISITA SA CRI; KOOPERASYON NG CHINA AT PILIPINAS SA PAMAMAHAYAG, PATULOY NA LUMALAKAS

Bilang bahagi ng patuloy pang lumalakas at bumubuting kooperasyon sa pagitan ng mga media ng China at Pilipinas, bumisita kahapon, Huwebes, Hulyo 7, 2017 ang 27-kataong delegasyong pang-media ng  Pilipinas sa tanggapan ng Serbisyo Filipino ng China Radio International (SF-CRI) sa Beijing.

Sa maikling presentasyon bilang panalubong, isinalaysay ni Jade Xian, Director ng SF-CRI ang iba’t ibang gawain ng naturang Serbisyo: kabilang na rito ang mga programa sa radyo, website at social media, paraan ng pangangalap ng balita, kooperasyon sa iba pang media ng Pilipinas at marami pang iba.

Ipinakita rin sa mga miyembro ng naturang delegasyon ang mahahalagang bagay sa loob ng tanggapan ng CRI na nagpapakita sa kasaysayan nito, partikular ang kasaysayan ng SF.

Sa panayam ng SF kay Novelen Lozada, Executive Assistant II ng Presidential Communications Operations Office (PCOO) at pinuno ng Philippine Delegation, sinabi niyang noong Oktubre 20, 2016 nang bumisita sa Beijing si Pangulong Rodrigo Roa Duterte sa Tsina, ang Memorandum of Understanding (MOU) on News and Information Exchange, Training and for Other Purposes, ay nilagdaan ng PCOO ng Pilipinas at Tanggapan ng Impormasyon ng Konseho ng Estado ng Tsina. Dahil dito, naimbitahan aniya ang 27 mamamahayag ng Pilipinas na bumisita sa Tsina, upang tingnan ang mga pag-unlad na natamo ng Tsina sa larangan ng media at makipagpalitan sa kanilang mga counterpart na Tsino.

Dagdag pa niya, napakainam na mayroong Serbisyo Filipino dahil ito ang daan upang maipa-abot sa mga kababayang Filipino, na nasa Pilipinas kung ano ang tunay na nangyayari sa China.

Ayon naman kay Apolonio Anota III, Media Accrediation and Relations Officer ng PCOO, “eye-opener” ang karanasan niya sa China, at kahanga-hanga ang mga bagong teknolohiya at kaalaman ng Tsina sa pamamahayag.

Aniya, marami nang pag-unlad ang nakamtan ng China sa larangang ito at ganito rin ang gusto niyang matutunan ng mga mamamahayag na Filipino upang mapaunlad din ang industriya ng pamamahayag sa Pilipinas.

Dagdag pa ni Anota, hindi niya malilimutan ang mga natutunan kung paano gamitin ng China ang multi-media sa pagpapa-abot ng mga saligang impormasyon sa mga mamamayan.

Ayon naman kay Marianne Angela Abella, Senior Community Manager ng PCOO, sobrang family-oriented, malambing, mababait, at hospitable ang mga Tsino.

Noong Pebrero 2017 ay pinamunuan ni Presidente Wang Gengnian ng CRI ang isang delegasyon patungo sa Pilipinas upang lagdaan ang mga Memorandum of Agreement (MOA) kasama ang Presidential Communications Operations Office (PCOO), People’s Television Network (PTV), Radyo ng Bayan, at Philippine News Agency (PNA).

Ang mga MOA na ito ang magiging daan sa pagbubukas ng bagong kabanata sa pagpapalitang pang-media ng China at Pilipinas. (CRI/DZME)

PAG-UUNAWAAN NG CHINA AT SINGAPORE SA NUCLEAR INTEREST, IPINANAWAGAN NI CHINESE PRESIDENT XI JINPING

Hamburg, Germany —Sa kanyang pakikipagtagpo kay Prime Minister Lee Hsien Loong ng Singapore, sinabi ni Chinese President Xi Jinping na kailangang isulong ng dalawang bansa ang kanilang relasyon batay sa estratehikong pananaw. Nanawagan din siyang panatilihin ng dalawang bansa ang pag-uunawaan at suporta sa isa’t isa hinggil sa mga nuclear interest at mga isyung mahalaga sa bawat panig.

Kapwa sila kalahok sa Ika-12 Group of 20 (G20) Summit na binuksan ngayong araw. 

Hiniling din ni President Xi na pagaanin ang mga pangunahing proyekto sa pagitan ng dalawang pamahalaan, at palawakin ang kooperasyon sa mga larangan ng bagong teknolohiya, gaya ng Internet at information communication.

Ipinahayag naman ni Lee ang kahalahagan ng pakikipagtulungan ng Singapore sa China sa ilalim ng kasalukuyang komplikadong kalagayang pandaigdig. Tiniyak din ni Lee ang patuloy na suporta at pakikilahok ng kanyang bansa sa magkakasamang pagsusulong ng Belt and Road Initiative. Nakahanda rin aniya ang Singapore na palawakin ang mga proyektong pampamahalan, at pagtutulungan sa pinansyal, high-speed railways at malayang kalakalan. (CRI/DZME)

MGA PAGKAKATAON SA PAGSUSULONG NG KOOPERASYON, HINDI DAPAT PALAMPASIN NG ASEAN AT CHINA

Sa isang panayam kamakailan sa Jakarta, Indonesia, ipinahayag ni AKP Mochtan, Vice-Secretary General ng Association of Southeast Asian Nations (ASEAN), na kapwa samantalahin ng ASEAN at China mahahalagang pagkakataon ngayon para palakasin ang kanilang kooperasyon.

Sinabi ni Mochtan, na nitong mga nakalipas na taon, iniharap ng China ang Belt and Road Initiative, at aktibo namang lumalahok dito ang mga bansang kasapi ng ASEAN.

Samantala, nagkabisa na aniya ang upgraded version ng ASEAN China Free Trade Area, at mabunga ang mga platapormang pangkooperasyon, na gaya ng China ASEAN Expo.

Naniniwala si Mochtan, na ang mga ito ay nagbigay ng mahahalagang pagkakataon sa kooperasyon ng ASEAN at China sa hinaharap. (CRI/DZME)

PAGPAPANUMBALIK NG MALUSOG NA PAG-UNLAD NG RELASYON NG CHINA AT SOUTH KOREA, INAASAHAN NI CHINESE PRESIDENT XI JINPING

Sa kanyang pakikipagpulong kay South Korean President Moon Jae-in, ipinahayag kahapon, Hulyo 6, 2017 ni Chinese President Xi Jinping ang kahandaan na ibalik sa malusog na pag-unlad ang relasyon ng dalawang bansa.

Ang dalawang pangulo ay kapwa kalahok sa Ika-12 Group of 20 (G20) Summit na binuksan ngayong araw.

Sinabi ni Xi na bilang dalawang bansang malapit sa isa’t isa, mayroon magkaparehong kultura at komplementaryong bentahe ang Tsina at Timog Korea. Aniya pa, nitong 25 taong nakalipas sapul nang itatag ang relasyong diplomatiko ng dalawang bansa, mabilis na umuunlad ang pag-uugnayan at nagdudulot ito ng kapakinabangan para sa mga mamamayan at kapayapaan ng rehiyon.

Idinagdag pa ni Xi na pansamantalang kinakaharap ng dalawang bansa ang kahirapan sa pagsusulong ng bilateral na relasyon, at hindi ito gustong makita ng China. Ipinahayag din niya ang mainit na pagtanggap sa kahandaan ng South Korea sa pagpapabuti ng bilateral na relasyon sa pamamagitan ng pagpapadala ng delegasyon sa Belt and Road Forum for International Cooperation na idinaos sa Beijing noong Mayo, at pagpapadala ng sugo sa China para ipaabot ang liham ni Moon.

Ipinahayag naman ni Moon ang mataas na pagpapahalaga sa relasyon sa Tsina. Aniya pa, sapul nang manungkulan siya bilang pangulo, isinusulong niya ang pakikipag-ugnayan sa China para mapalago ang pagpapalitan at pagtutulungan sa iba’t ibang lebel at sektor. Binigyang-diin din ni Moon na nauunawaan niya ang mga nuclear interest at isyung mahalaga sa China. Nakahanda rin aniya siyang palalimin ang pakikipag-ugnayan sa China. (CRI/DZME)

MUNGKAHI SA PAGPASOK NG CHINESE COMPANIES SA ASEAN, INILATAG

Sa kanyang panayam kamakailan sa Phnom Penh, inilatag ni Xu Ningning, Executive Secretary General ng China-ASEAN Business Council, ang mungkahi tungkol sa pagpasok ng Chinese firms sa Association of Southeast Asian Nation (ASEAN).

Aniya, sa ilalim ng pagpapasigla ng konstruksyon ng Belt and Road at pag-a-upgrade ng Malayang Sonang Pangkalakalan ng Tsina at ASEAN, mas maraming Chinese companies ang pumapasok sa pamilihan ng ASEAN.
Pero aniya, karamihan sa 10 bansang ASEAN ay mga umuunlad na bansa, at di-balanse ang pag-unlad ng kabuhayan sa loob ng ASEAN.
Inimungkahi niyang dapat pagbigyan na unahin ang Chinese firms, lokalisasyon at mutuwal na kapakinabangan, para maisakatuparan ang pangmatagalang pag-unlad. (CRI/DZME)