PANIBAGONG TAAS PRESYO SA PRODUKTONG PETROLYO… ASAHAN BUKAS

Asahan ang panibagong taas presyo sa mga produktong petrolyo bukas.

Ayon sa Oil Industry Sources, posibleng tumaas ng singkwenta hanggang otsenta sentimos ang kada litro ng diesel at gasolina.

Noong nakaraang Martes ay tumaas ng 65 centavos ang kada litro ng gasolina habang 60 centavos sa diesel.

70 centavos naman ang itinaas sa bawat litro ng kerosene o gaas. (Lea Rivera).

PAMAHALAAN… NANINDIGAN SA PAGKANSELA SA IKA-LIMANG ROUNDS NG PEACE TALKS SA MGA KOMUNISTA; MGA LEFTIST CABINET MEMBER… PINASISIBAK KAY PANGULONG DUTERTE

Nanindigan ang Philippine Government Peace Negotiators sa desisyon nilang kanselahin ang ikalimang round ng peace talks sa National Democratic Front of the Philippines.

Ayon kay Presidential Peace Adviser Jesus Dureza, walang sapat na dahilan para baguhin ang kanilang desisyon dahil wala namang nagbago matapos ang pakikipag-usap nila kay Communist Party of the Philippines Chairman Jose Maria Sison.

Gayunpaman, nilinaw ni Labor Secretary at Government Chief Peace Negotiator Silvestre Bello III na hindi nila tuluyang pinuputol ang usapang pangkapayapaan.

Magugunitang, inanunsyo ng government negotiators noong sabado ang hindi paglahok sa ikalimang rounds ng peace talks, kasunod ng direktiba ng C-P-P sa N-P-A na paigtingin ang pag-atake sa pwersa ng pamahalaan.  ( Jessel Laid)

MAUTE TERROR GROUP… KUMBINASYON NG NARCO POLITICS, ABU SAYYAF AT ISIS

Kumbinsido si PNP Chief, Director General Ronald Dela Rosa na kumbinasyon ng narco politics, Abu Sayyaf, at ISIS ang Maute Terror Group.

Sinabi ni Dela Rosa na may common denominator  o  iisa ang  motibo ng mga nagsanib na grupo laban kay Pangulong Rodrigo Duterte .

Aniya, galit ang narco politics dahil nasagasaan ang kanilang drug operations habang hangad naman ng maute ang proteksyon nito at pampalakas ng puwersa ang pagsanib na rin ng ASG at ISIS.

Tiniyak naman ng PNP Chief na mananaig ang tropa ng pamahalaan upang mabilis na bumalik ang katahimikan sa Marawi City.

Samantala, blangko pa rin ang pnp kung ilan ba talaga ang maute group dahil sa huling datos ay animnapu’t isa na ang namamatay sa kanilang panig subalit lalo lang lumalakas.

Naniniwala si Dela Rosa na “Fluid” o mabilis na nakapagtatago ang maute kaya hindi agad sila masukol. ( Eunice Calma).

OPERASYON NG EXPANDED STL…TATALAKAYIN SA KAMARA

TATALAKAYIN mamayang ala-1 ng hapon, Mayo 29,  sa House Committee On Games And Amusements ang expanded operation ng small town lottery, ang legal number game na itinataguyod ng Philippine Charity Sweepstakes Office.

Pangungunuhan ito ni Paranaque Representative Gus Tambunting, sa pamamagitan ng house resolution no. 958 na nilagdaan ng ilang mga party-list congressmen at kasama sa tatalakayin ang umano’y planong pagpatay  kay  Charlie “Atong” Ang.

Si Ang, ang umano’y may-ari ng Meridien Vista Gaming Corporation, ay nasa kalagitnaan ng  kontrobersya dahil sa kanyang mga number games sa labas ng Cagayan Economic Zone Authority sa sta. Ana, cagayan, na ipinahayag na iligal ng pamahalaan.

Si Ang umano’y kumikita mula sa kanyang jueteng operations ng tinatayang mahigit P2.37 billion kada buwan ngunit hindi pa umano ito nagbabayad ng buwis sa humigit na siyam na taon mula sa operasyon ng MVGC  sa 13 na lalawigan sa bansa.

Sinabi ni Justice Secretary Vitaliano Aguirre na mayroon umanong bayaring back taxes si Ang na nagkakahalaga ng humigit sa P25 billion.

Kamakailan, nanawagan si Aguirre sa Bureau Of Internal Revenue  upang pag-aralan ang pag-file ng isang naaangkop na kaso laban sa nasabing gambling lord.

Samantala, inaasahang dadalo sa pagdinig sina PCSO General Manager Alexander Balutan, Aguirre at National Security Adviser Hermogenes Esperon Jr.EC

 

PILIPINAS, NIYANIG NG MAGNITUDE 5.4 NA LINDOL

Inuga ng magnitude 5.4 na lindol ang lalawigan ng Zambales, 10:27, kagabi.

Ayon sa Philippine Institute of Volcanology and Seismology (PHIVOLCS), natunton ang sentro ng lindol sa San Marcelino, Zambales.

Kabilang sa nakaranas ng malakas na pagyanig ang mga kalapit probinsya ng Zambales, maging sa iba’t ibang bahagi ng Metro Manila.

Nilinaw ng PHIVOLCS na hindi magdudulot ng tsunami ang lindol na tectonic in origin subalit asahan ang mga aftershocks. (CRI/DZME News Team)

AFP, NAGLUNSAD NG AIRSTRIKE PARA PULBUSIN ANG MGA TERORISTANG MAUTE

Ginamitan na ng airstrike ng militar ang natitirang halos 40 miyembro ng Maute group sa Marawi City.
Mula ng magsimula ang bakbakan noong Martes, Mayo 23, 2017, 31 terorista na ang napatay.

Ayon sa Armed Forces of the Philippines (AFP), sentro ng kanilang operasyon ang tatlong lugar kung saan nananatili ang mga bandido.

Una nang iniulat ng AFP noong Miyerkules ng gabi, Mayo 24, na 120 sibilyan na dinukot ng mga terorista ang kanilang nailigtas. (CRI/DZME News Team)

RUSSIAN PRESIDENT VLADIMIR PUTIN…INIMBITAHAN NI PANGULONG DUTERTE SA PILIPINAS

Inimbitahan ni Pangulong Rodrigo Duterte si Russian President Vladimir Putin na bumisita sa Pilipinas.

Ayon kay Foreign Affairs Secretary Alan Peter Cayetano, naging bukas naman si Putin sa imbitasyon ni Pangulong Duterte at umaasang pupunta ang lider.

Ang dalawang lider ay maraming beses nang nagkaharap sa Peru, China at nitong huli ay sa Moscow.

Inaasahan naman ang pagdating ni Russian Prime Minister Domitry Medvedev sa bansa sa Nobyembre para sa Asean Summit.  ( Jane Manalastas).